रेनुको पक्षमा भोट माग्दै प्रधानमन्त्री देउवाले भने –‘रेनुको कार्यकालमा भरतपुरमा धेरै विकास भएको छ’

  • बिहिबार, बैशाख २२, २०७९

काठमाडौ । नेपाली कांग्रेसका सभापति तथा प्रधानमन्त्री शेरबहादुर देउवाले भरतपुर महानगरपालिकाको मेयरमा रेनु दाहाललाई जिताउनु पर्ने बताउनु भएको छ ।

बिहिबार सत्तारुढ गठबन्धनद्वारा चितवनको भरतपुरमा आयोजित चुनावी सभालाई सम्बोधन गर्दै देउवाले रेनुलाई जिताउन चितवन कांग्रेसले सघाउनु पर्ने बताउनुभएको हो । उहाँले रेनुको कार्यकालमा भरतपुरमा धेरै विकास भएको भन्दै रेनुले आफ्नै कामले फेरि चुनाव जितिसकेको उल्लेख गर्नुभयो । रेनुको पक्षमा भोट माग्दै देउवाले अहिले सत्तारुढ पाँच दलीय गठबन्धन आवश्यक रहेको भन्दै त्यसलाई बचाउन कार्यकर्ता र चितवनबासीलाई आग्रह गर्नुभयो ।

उहाँले गठबन्धनका कारणनै आफू प्रधानमन्त्री भएको भन्दै मेयर पदमा पुन उम्मेदवारी दिनुभएकी दाहाललाई कुनै पनि अवस्थामा सहयोग गर्न आग्रह गर्नुभयो । प्रधानमन्त्री देउवाले सत्ता गठबन्धन टुटाउन बिभिन्न षडयन्त्र भइरहेको भन्दै त्यो कुनै पनि हालतमा सफल हुन नदिने उल्लेख गर्नुभयो ।