अमेरिकाको ज्याक्सनमा खानेपानीको चरम अभाव

काठमाडौं । अमेरिकाको मिसिसिपीको ज्याक्सनका करिब १ लाख ८० हजार बासीन्दालाई खानेपानीको चरम अभाव भएको छ ।

अत्याधिक वर्षा र बाढीका कारण भरपर्दो पिउने पानीको पहुँचबाट उनीहरू बञ्चित भएका हुन् । सप्ताहान्तमा आएको बाढीका कारण शहरको मुख्य पानी प्रशोधन परिसर क्षतिग्रस्त भएपछि पानीको चरम अभाव हुन थालेको हो । पानी अभाव भएपछि मिसिसिपी राज्यमा आपत्कालीन स्थिति घोषणा गरिएको छ ।

केही समयका लागि विद्यालय, रेस्टुरेन्ट र व्यापार व्यवसायहरू बन्द गरिएका छन् । तर, स्थानीय बासीन्दालाई प्रशोधन नगरिएको पानी पाइपमार्फत आपूर्ति गरिएको बताइएको छ । नगर र राज्य दुवैले जनतालाई पिउनका लागि बोटलको र ट्याङ्करमार्फत पानी उपलब्ध गराइरहेका छन् ।

ज्याक्सनका बासीन्दालाई पानी उमालेर मात्रै पिउन पनि सल्लाह दिइएको छ । पर्ल नदीको बाढीको पानी उर्लेर सडकसम्म पुग्न थालेपछि पानी प्रशोधन केन्द्र प्रभावित भएको थियो । विज्ञहरूले जलवायु परिवर्तन समस्याका कारण ज्याक्सनमा अति वर्षा जस्ता घटना हुन थालेको बताएका छन् ।