कपिलवस्तु । कपिलवस्तुको बुद्धभूमि नगरपालिका– ९ गुडरुङ खोला लिफ्ट सिँचाइ योजना तीन वर्षदेखि बन्द भएको छ ।
निर्माण सम्पन्न भएपछि रेखदेख नहुँदा लिफ्ट सिँचाइ योजना तीन वर्षदेखि बन्द भएको हो ।
नगरपालिकाको वडा नम्बर ८ र ९ का करिब ५ सय विगाहा खेतीयोग्य जमिनलाई सिँचाइ गर्न पुग्ने योजनामा क्षति हुँदा कृषकहरु महँगो इन्धन खर्च गरी पम्पसेटबाट सिँचाई गर्न बाध्य छन् ।
करोडौँको लागतमा लिफ्ट सिँचाइ योजना निर्माण हुँदा पनि जिम्मेवार निकायले अपनत्व नलिँदा कृषकहरुले सास्ती खानु परेको स्थानीयको गुनासो छ । दैनिक एक हजारको डिजल खरिद गरेर सिँचाई गर्नु परेको उनीहरु बताउँछन् ।
रेखदेख नहुँदा केही उपकरणमा क्षति पुगेको लिफ्ट सिँचाइ योजनाको अवलोकन गर्न पुग्नु भएका लुम्बिनी प्रदेश सभा सदस्य नवराज लामिछानेले बताउनुभयो । उहाँले लिफ्ट सिंचाई योजनामा मर्मत गरी पुनः सुचारु गर्न सकिने भएकाले सञ्चालनका लागि पहल गर्नेमा जोड दिने स्पष्ट पार्नु भयो ।
लिफ्ट सिँचाइ योजना २०७३ सालमा निर्माण सम्पन्न भएको थियो ।
