ईमेज च्यानल आजबाट २६ औं वर्षमा प्रवेश

काठमाडौं । नेपालको पहिलो नीजि टेलिभजिन ईमेज च्यानल आज आइतबारबाट २६ औं वर्षमा प्रवेश गरेको छ ।

२०५३ साल माघ १ गते नेपाल टेलिभिजनको पर्दाबाट आफ्नो प्रशारण सुरु गरेको ईमेज च्यानलले २०५९ साल माघ १७ गतेदेखि काठमाडौं उपत्यकाका दर्शकलाई लक्षित गरी टेरेष्ट्रियल माध्यमबाट ईमेज मेट्रो च्यानल सुरु गरेको थियो । दर्शकहरुको अपार साथ र समर्थनको कदर गर्दै लोकतन्त्रको बिहानीसँगै २०६३ साल माघ ११ गतेदेखि ईमेज च्यानलले स्याटेलाइटमार्फत आफ्नो प्रसारणलाई विश्वभर जोड्यो ।

विश्वसनीय समाचार, सन्तुलित बिचार र स्वस्थ मनोरञ्जनको मुल नारासहित अहिले ईमेज च्यानल एच.डी प्रविधिमार्फत विश्वभर प्रसारण भईरहेको छ ।

दर्शक स्रोताहरुको सद्भावकै कारण ईमेज च्यानलले २०५५ पुस २३ गतेदेखि के.ए.टी.एच.को नामबाट एफ.एम प्रसारण सुरु गर्‍यो । अहिले ईमेज एफ.एम ९७.९ को रुपमा यो एफ.एम २४ सै घण्टा समाचार, बिचार र मनोरञ्जन लिएर प्रसारण भईरहेको छ ।

ईमेज परिवारको अर्को सदस्यको रुपमा २०६५ भदौ २९ गतेदेखि प्रसारणमा आएको ईमेज न्युज एफएम १०३.६ ले हरपल निरन्तर समाचार प्रसारण गरिरहेको छ ।