विराटनगर, ५ जेठ । मोरङको रङ्गेली नगरपालिकामा महिलाको घाँटी रेटेर हत्या गरेको अवस्थामा शव फेला परेको छ । रङ्गेली नगरपालिका–३ तिलुवा चोकस्थित सुख्खा नहरमा २४ वर्षीया अनिता यादवको शव हत्या गरिएको अवस्थामा बुधबार बिहान फेला परेको हो ।

स्थानीउ बेचन यादवकी पत्नि अनिताको शव देखेपछि स्थानीयले प्रहरीलाई जानकारी गराएका थिए । घटनाको जानकारीलगत्तै खटिएको जिल्ला प्रहरी कार्यालय मोरङको प्रहरी टोलीले अनुसन्धान गरिरहेको छ ।

मोरङ प्रहरीका एसपी सन्तोष खड्काका धारिलो हतियार प्रयोग गरी घाँटी रेटेर हत्या गरिएको अवस्थामा शव फेला परेको हो । घरदेखि करिब ढेड किलोमिटर दक्षिणमा अनिताको शव फेला परेको खड्काले जानकारी दिए ।

‘घटनाको प्रकृति हेर्दा घाँटी रेटेर हत्या गरेपछि शव नहरमा फ्यालेको देखिन्छ,’ एसपी खड्काले केटिएम दैनिकसँग भने, ‘यसबारे अनुसन्धान जारी छ । केही समयपछि पत्ता लाग्नेछ ।’ उनका अनुसार महिलाको हत्यामा कस्तो खालको हतियार प्रयोग गरिएको हो भन्ने यकिन भइसकेको छैन ।

अनुसन्धान सुरु भएसँगै चार जनालाई पक्राउ गरिएको उनले जानकारी दिए । पक्राउ पर्नेमा मृतककी पति बेचनसहित, सासू, ससूरा र देवर विनोद यादव रहेका छन् । उनीहरूलाई नियन्त्रणमा लिएर अनुसन्धान अगाडि बढाएको प्रहरीले जनाएको छ ।