कोरोनाबाट दुई लाख ७६ हजार नयाँ संक्रमित थपिँदा ३८ सय ७४ जनाको मृत्यु

  • बिहिबार, जेष्ठ ६, २०७८

एजेन्सी, जेठ ६ । भारतमा कोरोनाबाट पछिल्लो २४ घण्टामा दुई लाख ७६ हजारभन्दा धेरै नयाँ संक्रमित थपिएका छन् । भारतमा सातौं दिन पनि नयाँ संक्रमितभन्दा निको हुनेको संख्या बढी छ ।

भारतीय स्वास्थ्य मन्त्रालयका अनुसार पछिल्लो २४ घण्टामा कोरोनाबाट दुई लाख ७६ हजार ११० नयाँ संक्रमित थपिँदा ३ लाख ६८ हजार ७८८ जना निको भएका छन् । तीन हजार ८७४ जनाको मृत्यु भएको छ ।

भारतमा हालसम्म कोभिड–१९ बाट दुई लाख ८७ हजार १२२ जनाको मृत्यु हुँदा ३१ लाख २९ हजार ८७८ जना सक्रिय संक्रमित छन् ।

दुई करोड ५७ लाख ७२ हजारभन्दा बढी संक्रमित भएको भारतमा अहिलेसम्म करिब १८ करोड ७० लाख १० हजार जनाले कोरोना भाइरसविरुद्धको खोपको कम्तीमा एक मात्रा लगाएको जनाइएको छ ।