• सोमवार, साउन ३२, २०७८

काठमाडौं । काठमाडौंको नयाँ बसपार्कमा टिकट काट्दा अब बिचौलियाको ठगी र सीट नपाएको गुनासो गर्नुनपर्ने भएको छ ।

बसपार्क व्यवस्थापनले डिजिटल प्रविधिमा टिकट उपलब्ध गराउन थालेपछि यात्रु ठगिन कमी भएको छ । यसरी टिकट काटदा यात्रुको रोजाइ र रुचिअनुसारको टिकट पाइने बसपार्क प्रशासनले जनाएको छ ।

फिल्म हलमा झैँ बिक्री भए नभएको टिकट टाढैबाट ठम्याउन सकिन्छ । कुनै विचौलियाले अल्मल्याउन पाउने छैन । यसले बिचौलिया प्रथा अन्त्य हुने बसपार्कका कर्मचारी जीवन ढकालको विश्वास छ ।

टिकट काटेको स्पष्ट रेकर्ड वर्षौंसम्म सुरक्षित रहनेछ । यो प्रविधिसँगै टिकट काउन्टरका कर्मचारी आफूहरुमाथि लाग्ने गरेको आक्षेपबाट मुक्ति पाउने बताउँछन् ।

‘चाडबाडमा हामीलाई टिकट लुकाएको र आफ्ना मान्छेलाई दिएको आक्षेप लाग्ने गर्थ्यो,’ ढकाल भन्नुहुन्छ, ‘यो सिस्टम लागू भएसँगै अब हामीले त्यस्ता आक्षेपबाट पनि मुक्ति पाउनेछौं ।’

समयअनुकूल परिष्कृत यो प्रविधिले यात्रु पनि खुशी छन् । यसले समयको बचत, सुरक्षाका दृष्टिले समेत ढुक्क हुने अवस्था रहेको उनीहरूको ठहर छ ।

उडान सेवालाई मात्र महत्वको कोटीमा राख्ने परम्परा विपरीत बसपार्कमा देखिएको यो परिवर्तन आफैँमा सकारात्मक प्रयास हो । यसलाई दिगो र विश्वसनीय बनाई निरन्तता दिनु आवश्यक छ ।