१ भदौ, डोटी । डोटी जिल्लामा निषेधाज्ञा एक महिना थपिएको छ । जिल्ला कोरोना संकट व्यवस्थापन केन्द्र (डिसिसिएमसी) को सोमबार बसेको बैठकले डोटीमा भदौ ३१ गतेसम्म निषेधाज्ञा थप गर्ने निर्णय गरेको हो ।

निषेधाज्ञाको समयमा यातायातका सम्पूर्ण सवारी साधन जिल्लाभित्र चलाउन पाइने भएको छ । पार्टी प्यालेस, जिमखाना र स्वीमिङ पुल बाहेकका अन्य सबै प्रकृतिका पसलहरु बिहान ६ बजेदेखि साँझ ७ बजेसम्म नेपाल सरकारले तोकेको स्वास्थ्य मापदण्डको पूर्ण पालना गरी खोल्न पाइने लगायतका विभिन्न निर्णय गरिएको डोटीका निमित्त प्रमुख जिल्ला अधिकारी किरण जोशीले बताइन् ।

निमित्त प्रजिअ जोशीले कोरोना भाइरस संक्रमण दिनानुदिन बढिरहेको समयमा यसबाट सुरक्षित रहन निषेधाज्ञा सबैभन्दा उत्तम विकल्प रहेको बताइन् ।

दोश्रो लहरको संक्रमण बढ्न थालेपछि डोटीमा बैशाख २१ गते वैशाख ३१ गतेसम्मको लागि निषेधाज्ञा थप गरिएको थियो । यो नवौं पटक थपिएको निषेधाज्ञा हो ।