दुवै नयाँ पार्टीले फेरे नाम, एमालेमा तेस्रो धारले भावी रणनीति तयार पार्दै

  • शुक्रबार, भदौ ४, २०७८

१. अध्यादेश अन्तर्गत विभाजित भएर बनेका दुवै नयाँ पार्टीको नाम फेर्न प्रस्ताव

एमाले विभाजनपछि माधवकुमार नेपालको नेतृत्वमा गठन भएको दल र जसपा नेपाल विभाजन भएपछि महन्थ ठाकुरको नेतृत्वमा गठन भएको दलले निर्वाचन आयोगमा दलको नयाँ नाम प्रस्ताव गरेका छन् ।
यसअघि माधवकुमार नेपाल नेतृत्वको दलले नेकपा एमाले (समाजवादी) र महन्थ ठाकुर नेतृत्वको दलले जसपा नेपाल (लोकतान्त्रिक) प्रस्ताव गरेकोमा आयोगले यसअघिकै सूचनालाई आधार मानेर आयोगमा दर्ता भएका कुनै पनि दलको मूल नामको अगाडि वा पछाडि केही फुर्को थपेर नयाँ दल दर्ता गर्न नसकिने जनाएपछि दुवै दलले नयाँ नाम प्रस्ताव गरेका हुन् ।
माधवकुमार नेपाल नेतृत्वको दलले नेकपा एकीकृत समाजवादी पार्टी र महन्थ ठाकुर नेतृत्वको दलले लोकतान्त्रिक समाजवादी पार्टी नाम प्रस्ताव गरेको हो ।