दयाराम आचार्य
कावासोती । अविरल वर्षाका कारण डाइभर्सन बगाएर अवरुद्ध भएको पूर्व पश्चिम राजमार्ग अझै सहज रुपमा सञ्चालनमा आउन सकेको छैन् । नवलपरासी (बर्दघाट सुस्तापूर्व ) नवलपुरको गैंडाकोट २३ स्मृति नजिक बिहीबार राति ९ बजेबाट डाइभर्सन बगाएर अवरुद्ध भएको पूर्व पश्चिम राजमार्ग अझै सहज रुपमा सञ्चालनमा आउन नसकेको जिल्ला प्रहरी कार्यालय नवलपरासी पूर्व नवलपुरका सूचना अधिकारी मधुसुदन सिंहले बताउनुभयो ।
करिब २९ घण्टा पछि मर्मत गरेर शनिबार (आज ) बिहान २ बजेबाट यातायात सञ्चालनको प्रयास गरेपनि सवारीहरू सहज रुपमा वार पार हुन नसकेको सूचना अधिकारी सिंहले बताउनुभयो । डाइभर्सन निर्माण गरिएको भएपनि गाडीहरू हिलोमा फस्दा यातायात पूर्ण रुपमा सञ्चालन हुन नसकेको उहाँले बताउनुभयो ।
डाइभर्सन निर्माण गरेको स्थानमा हिलो र दलदल भएकाले यातायात सञ्चालनमा आउन नसकेको सूचना अधिकारी सिंहले बताउनुभयो । भरखरै निर्माण गरिएकाले दलदल र हिलोले समस्या भएको उहाँले बताउनुभयो । हिलो भएको स्थानमा ग्राभेल राखेपनि दलदल हट्न केही समय सुक्नुपर्ने हुँदा पूर्ण रुपमा कतिबेलाबाट यातायात सञ्चालन हुन सक्छ यकिन गर्न नसकिने उहाँले बताउनुभयो ।
थुम्सी र भेडाबारी क्षेत्रका अन्य डाइभर्सन भने मर्मत गरिएको छ । अन्य डाइभर्सनमा अहिले कुनै समस्या नभएको सूचना अधिकारी सिंहले बताउनुभयो ।
लामो समय देखी राजमार्ग अवरुद्ध हुँदा यात्रुहरूलाई समस्या भएको छ । जङ्गलको क्षेत्रमा सवारी रोकिँदा यात्रुहरूलाई झनै समस्या भएको छ । खाजा ,खाना ,पानीको लागि सहज नहुदाँ यात्रु समस्यामा परेका छन् ।
यसै गरि नवलपुरको विनयी त्रिवेणी स्थित दाउन्नेमा पहिरो खसेर अवरुद्ध भएको राजमार्ग भने पहिरो पन्छाएर एकतर्फी रुपमा सञ्चालनमा ल्याइएको छ ।
