कञ्चनपुर । रोजगारीका लागि राम्ररी नबुझि विदेश जाँदा म्यानपावरबाट ठगिने वा विदेशमै पुगेर पनि अधिकांश युवाहरुले दुःख पाउने गरेका छन् । प्रक्रिया पु¥याएर गएकाले पनि कागजातका प्रमाणहरु घरमा नछोड्दा र विदेशमै निधन हुँदासमेत सरकारबाट पाउने राहत तथा क्षतिपूर्ति पाउन समस्या हुने गरेको छ ।

कञ्चनपुरको कृष्णपुर नगरपालिका– ६ की ३१ वर्षीया कौशिला विकका श्रीमान जयसिंह विकको गत वैशाखमा साउदी अरबमा निधन भयो । धन कमाउने आशामा विदेश गएको ५ महिनामै कौशिलाका श्रीमानको मृत्यु भएपछि उनको परिवारको विचल्ली भएको छ । आर्थिक अवस्था कमजोर भएका कारण उनको शवसमेत नेपाल ल्याउन सकेको छैन । दुई महिनासम्म कसैले श्रीमानको शव ल्याउन पहल गरिदिन्छ कि भन्ने आशमा बस्नु भएकी विकले पछि उतै अन्तिम संस्कार गर्न भन्नुभयो । सेतै पहिरनमा बसेकी उहाँलाई श्रीमानको अन्तिम संस्कार भयो वा भएन अहिलेसम्म जानकारी छैन ।

ऋण गरेर विदेश गएका जयसिंह विक तीन महिना जागिर बिना खाली बसेपछि चैत महिनाबाट मात्र काम सुरु गरेका थिए । तर वैशाखको पहिलो साता नै बिरामी परेर अस्पताल भर्ना भएका विकको २० गते मृत्युको खबर आयो । अहिले जयसिंहकोे परिवारलाई बस्नका लागि दुई कोठाको घरबाहेक खानका लागि अन्नसमेत छैन ।

कौशिलालाई एकातिर छोराछोरी पाल्ने चिन्ता छ भने अर्कोतिर श्रीमानले विदेश जाँदा लिएको झण्डै ११ लाख ऋणको भारी छ । श्रीमानले लिएको ऋणको पैसा माग्न साहु आउँदा उनी आत्तिएर बेहोस हुने गरेको छिमेकी बताउँछन् ।

पछिल्लो समय युवाहरु नबुझिकन विदेश जाने गरेका छन् । यसरी जानेहरुमध्ये कतिपय म्यानपावरबाटै ठगिएका छन् भने कतिपय काठको बाकसमा फर्किनु पर्ने अवस्था छ । तर जयसिंह विकले श्रम स्वीकृति लिएर गएको भएपनि त्यसको प्रतिलिपि भने घरमा नछोडकाले पीडित परिवारलाई सरकारबाट पाउने राहत तथा क्षतिपूर्तिको लागि प्रक्रिया अगाडी बढाउन समस्या भएको हो ।

तसर्थ रोजगारीका लागि विदेश जाँदा श्रम स्वीकृति लिएर जाने वा भएका कागजातहरुको प्रतिलिपि घर र आफन्तलाई छोडेमा त्यसले पीडित परिवारले बेलैमा राहत तथा क्षतिपूर्ति पाउन सहयोग पुग्नेछ ।