जारी सिजन खराब नतिजाबाट गुज्रिएको बार्सिलोनाको यो लगातार दोस्रो बराबरी हो । अघिल्लो खेलमा पनि बार्सिलोना ग्रानाडासँग आफ्नै मैदानमा १–१ गोलको बराबरीमा रोकिएको थियो ।
गत सिजनमात्र शीर्ष डिभिजनमा उक्लिएको क्याडिजलाई बार्सिलोनाले हराउन सकेको छैन । गत सिजन पहिलो खेलमा बार्सिलोना क्याडिजसँग २–१ गोलले पराजित भएको थियो । अर्को खेलमा १–१ गोलको बराबरीमा रोकिएको थियो ।
बराबरीसँगै बार्सिलोना सातौं स्थानमा छ । पाँच खेलमा दुई जित र तीन बराबरी नतिजा निकालेको बार्सिलोनाको नौ अंक छ । ६ अंक बनाएको क्याडिज १४औं स्थानमा छ । शीर्षस्थानमा रहेको रियल म्याड्रिडको ६ खेलबाट १६ अंक पुगेको छ । दोस्रो स्थानमा रहेको एट्लेटिको म्याड्रिडको १४ र तेस्रो स्थानमा रहेको रियल सोसिडाडको १३ अंक छ ।
शनिबार राति भएको खेलमा ग्रानाडालाई ३–२ गोलले हराउँदै सोसिडाड तेस्रो स्थानमा उक्लिएको हो । सोसिडाडको जितमा अरित्ज इलुस्टोन्डोले दुई तथा माइकल मेरिनोले एक गोल गरे । ग्रानाडाका जर्मन सान्चेज र लुईस मिल्लाले गोल गरेका थिए ।
