• शनिबार, फाल्गुन २८, २०७८

काठमाडौं । दुई महिना अघिदेखि ग्राउण्डेड नेपाल वायु सेवा निगमको न्यारो बडी जहाजले पुनः नियमित उडान सुरु गरेको छ ।

इन्जिनमा समस्या देखिएपछि कतारको दोहामा २ महिनादेखि ग्राउण्डेड भएको न्यारो बडी ए–३२० जहाजले शनिबारदेखि उडान सुरु गरेको हो ।

ग्राउण्डेड जहाजको मर्मतपछि शनिबारदेखि नियमित उडान सुरु गरिएको निगमका कार्यकारी अध्यक्ष युवराज अधिकारीले जानकारी दिनुभयो ।

२८ डिसेम्बर २०२१ को काठमाडौं–दोहा नियमित उडानमा सुरक्षित अवतरण गरेपश्चात् पार्किङ गर्ने क्रममा उक्त जहाजको एउटा इन्जिनमा प्राविधिक समस्या देखिएको थियो ।

दोहास्थित कतार एयरवेजका इन्जिनियरले जहाज निरीक्षण गर्दा बायाँतर्फको इन्जिनमा खराबी आएको थियो ।

प्राविधिकहरूले इन्जिन फेर्नुपर्ने प्राथमिक राय दिएपछि निगम व्यवस्थापनले जहाजलाई छिटो उडानयोग्य बनाउन इन्जिन भाडामा लिएर उडाउने निर्णय गरेको हो ।