कालोपत्रे भएको ७ वर्षसम्म मर्मत नहुँदा नेपालटार–मंगलबारे सडक क्षतिग्रस्त

इलाम । कालोपत्रे गरिएपछि नियमित मर्मत नहुँदा इलामको नेपालटार–मंगलबारे सडक पूर्ण रूपमा क्षतिग्रस्त भएको छ ।

२०७२ सालमा कालोपत्रे गरिएपछि मर्मत नहुँदा सडकमा साना सवारीसाधन सञ्चालनमै समस्या भएको हो । संघीय सरकारको सडक डिभिजनबाट कालोपत्रे भएको सडक नियमित मर्मत नहुँदा अहिले जीर्ण भएको छ ।

१२ किलोमिटर सडकको बिच–बिचमा सयौं खाल्टाखुल्टी र पहिरोले क्षति पुगेको छ । सडक मर्मत नहुँदा सवारीसाधन गुडाउनै समस्या भएको मंगलबारे उद्योग बाणिज्य संघका पूर्व अध्यक्ष मात्रिका घिमिरेले बताउनुहुन्छ । यसले पर्यटन व्यवसायमा ठूलो क्षति पुर्याएको उहाँको भनाइ छ ।

सडकको आधा खण्ड इलाम नगरपालिका र आधा देउमाई नगरपालिकामा पर्छ । सडक मर्मतका लागि बजेटको श्रोत नभएको भन्दै दुई स्थानीय तह पन्छिएका छन् । कालोपत्रे भइसकेको सडक मर्मतका लागि प्रदेश सरकारले पनि चासो दिएको छैन ।

संघीय र प्रदेश सरकारले नहेर्ने, स्थानीय तहले जिम्मेवारी नलिने भएपछि सडक अलपत्र परेको मंगलबारेका व्यवसायी मनकुमार श्रेष्ठ बताउनुहुन्छ । हिउँदमा जेनतेन सवारी चले पनि बर्षामा भने ट्याक्टरले तानेर सवारी ल्याउनुपर्ने उहाँको भनाइ छ ।

नेपालटार मंगलबारे सडक गत असोज र कात्तिकमा परेको बेमौसमी वर्षातबाट झनै क्षति पुगेको छ । २०१५ सालबाटै मोटर गुड्न थालेको यो सडक कालोपत्रेपछि पश्चिमि इलामका बासिन्दा आवातजावतमा सहज भएको थियो ।