एन. सन्चार न्युज 
काठमाडौँ । बालेन्द्र शाहको नेतृत्वमा नयाँ सरकार गठन भएको एक साताभित्रै गृह प्रशासनले आक्रामक कदम चालेको छ । नवनियुक्त गृहमन्त्री सुदन गुरुङले कार्यभार सम्हालेको सात दिनभित्रै पूर्वप्रधानमन्त्री, पूर्वमन्त्री र सांसदसहित आठ जना प्रभावशाली व्यक्तिहरू पक्राउ परेका छन् ।
गृहमन्त्रीले शपथ लिएको भोलिपल्टै अर्थात् चैत १४ गते जेनजी आन्दोलनमा दमन गरेको अभियोगमा तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखक पक्राउ परेका थिए । सोही दिन बलात्कार सम्बन्धी कसुरमा नेकपा एमालेका नेता कर्णबहादुर मल्ल पनि पक्राउ परेका छन् ।
पक्राउ पर्ने क्रम यतिमा मात्रै रोकिएन । चैत १५ गते सम्पत्ति शुद्धीकरण सम्बन्धी कसुरमा नेपाली कांग्रेसका नेता तथा पूर्वमन्त्री दीपक खड्का पक्राउ परे । सोही दिन बालश्रम शोषणको आरोपमा नेकपा एमालेकी नेतृ तथा लुम्बिनी प्रदेशसभा सदस्य रेखा शर्मालाई पनि प्रहरीले नियन्त्रणमा लियो ।
आन्दोलनमा अनावश्यक बल प्रयोगको आदेश दिएको अभियोगमा चैत १७ गते काठमाडौँका तत्कालीन प्रमुख जिल्ला अधिकारी (सीडीओ) छवि रिजाल पक्राउ परेका थिए । यद्यपि, उनलाई प्रहरीले सोही दिन हाजिर जमानीमा रिहा गरेको छ ।
यस्तै, सरकारको निशानामा व्यवसायीहरू पनि परेका छन् । चैत १९ गते सम्पत्ति शुद्धीकरण अनुसन्धानका क्रममा व्यवसायी दीपक भट्ट पक्राउ परे भने चैत २० गते शुक्रबार शंकर ग्रुपका सञ्चालक शंकर अग्रवाल पक्राउ परेका छन् ।
सुदन गुरुङले गृह मन्त्रालयको कमान्ड सम्हालेपछि एकपछि अर्को गर्दै शक्तिशाली व्यक्तिहरू पक्राउ पर्नुलाई नयाँ सरकारको सुशासन अभियानको रूपमा टिप्पणी गर्न थालिएको छ ।
