काठमाडौं : जेनजी पुस्ताको प्रदर्शनमा प्रहरीको गोली लागेर घाइते भएका २० वर्षीय युवकको पनि मृत्यु भएको छ। प्रदर्शनमा घाइते भएका २० वर्षीय युवकको अस्पतालमा उपचारका क्रममा मृत्यु भएको अस्पताल कर्मचारी युनियनका अध्यक्ष सन्तोष धिमालले जानकारी दिए।

प्रहरीको गोली लागेर गम्भीर अवस्थामा अस्पताल लिएका उनको इमर्जेन्सीमा उपचार हुँदाहुँदै केहीबेर अगाडि मृत्यु भएको हो। उनको परिचय खुल्न नसकेको अस्पताल स्रोतले जनाएको छ।
 
यसअघि सिभिल अस्पतालमै प्रदर्शनका क्रममा घाइते भएका करिब ४४/४५ वर्षका पुरुषको पनि मृत्यु भएको थियो। उनको शव पोस्टमार्टमका लागि त्रिवि शिक्षण अस्पताल लगिएको छ। 
 
केही प्रदर्शनकारी संघीय संसद् परिसरभित्र प्रवेश गरेपछि स्थितिलाई नियन्त्रणमा लिन प्रहरीले अश्रुग्यास, पानीको फोहराका साथै रबरको गोली चलाएको थियो। प्रहरीसहित धेरै प्रदर्शनकारी घाइते भएका छन्। घाइतेमध्ये केहीको अवस्था गम्भीर रहेको प्रहरीले जनाएको छ। त्यस्तै केही सञ्चारकर्मीसमेत घाइते भएका छन्।

प्रदर्शन नियन्त्रणबाहिर गएपछि स्थानीय प्रशासनले काठमाडौँका विभिन्न क्षेत्रमा कर्फ्यु आदेश जारी गरेको छ। अपराह्न १ बजेदेखि राति १० बजेसम्म लागू हुने गरी कर्फ्यु आदेश दिइएको हो। नयाँ बानेश्वर आसपासका क्षेत्र, शीतल निवास (राष्ट्रपति कार्यालय) वरपरको क्षेत्र, हरित गृह (उपराष्ट्रपति कार्यालय) वरपरको क्षेत्र, नारायणहिटी दरबार सङ्ग्रहालय क्षेत्र , केशर महल चोकदेखि जयनेपालमोड र महेन्द्र सालिक सम्म, सिंहदरबार क्षेत्र वरिपरि कर्फ्यु आदेश जारी गरिएको जिल्ला प्रशासन कार्यालय काठमाडौंले जनाएको छ ।