सुरक्षाकर्मीहरुबाट लुटिएका, फेला पारेका हतियार र गोलीगट्ठा बुझाउन सेनाको आग्रह

काठमाडौं : नेपाली सेनाले आन्दोलनका क्रममा सुरक्षाकर्मीहरुबाट लुटिएका / फेला पारेका हातहतियार, गोलीगट्ठा एवम् सुरक्षा सामग्रीहरु बुझाउन आग्रह गरेको छ।

नेपाली सेना जनसम्पर्क  निर्देशनालय तथा सूचना जंगी अड्डाले सूचना जारी गर्दै “Gen Z” नेतृत्वको आन्दोलनका क्रममा कोही कसैले सुरक्षाकर्मीहरुबाट लुटिएका / फेला पारेका हातहतियार, गोलीगट्ठा एवम् सुरक्षा सामग्रीहरु नजिकको सुरक्षा निकाय वा सुरक्षाकर्मीलाई यथाशीघ्र बुझाउन अनुरोध गरेको हो।

विज्ञप्तिमा भनिएको छ, ‘त्यस्ता हातहतियारहरुको दुरुपयोग भई जनधनको क्षति हुनसक्ने भएकोले त्यस सम्बन्धी सूचना प्राप्त गर्नुहुने व्यक्तिहरुले सुरक्षा निकायलाई जानकारी गराउन र सम्बन्धितलाई हतियार बुझाउन प्रेरित गर्नुहुन अनुरोध गरिन्छ ।’ उनले यस संवेदनशील परिस्थितिमा सुरक्षा निकायका पोशाकहरुको अनाधिकृत प्रयोग नगर्न नेपाली सेनाले अनुरोध गरेको छ ।

सेनाले उक्त हातहतियार र गोलीगट्ठा नबुझाई कसैसँग फेला परेमा प्रचलित कानून बमोजिम कारवाही हुने चेतावनी दिएको छ।