पानीको दुःख टर्छ, पैसा बच्छ

१७ असार, काठमाडौं । काठमाडौं महानगरपालिका–१५ डल्लुको आफ्नै घरमा मन्टेसरी स्कुल सञ्चालन गरेका नरेन्द्र डंगोललाई दैनिक १२०० लिटरसम्म पानी चाहिन्छ । घर र स्कुलका लागि ट्याङ्करको पानी किन्नु पर्दा उनले वार्षिक कम्तिमा १ लाख रुपैयाँ खर्च गर्नुपर्थ्यो । यो खर्च जोगाउन उनले आकाशे पानी उपयोगको जुक्ति लगाएका छन् ।

प्रकृतिले निःशुल्क दिने पानी सञ्चित गर्दा डंगोलले धेरै मिहिनेत गर्नु पर्दैन । महसुलको बिल मात्र आउने सरकारी धारा नजोडेका उनले घरको छतमा परेको पानीलाई पाइपबाट इनारमा झारेका छन् । त्यसैगरी, आँगन र वरपर परेको पानी जम्मा पार्न छुट्टै खाडल खनेका छन् । खाडलको पानी प्राकृतिक रूपमा फिल्टर भएर इनारमै पुग्छ ।

इनारमा जम्मा भएको पानी गाडी, मोटरसाइकल धुने, भुई पुछ्ने जस्ता काममा सीधै प्रयोग हुन्छ । भाँडाकुँडा र कपडा धुन एक पटक फिल्टर गर्दा राम्रो हुन्छ । दुई चरण फिल्टर गरेपछि मजाले खान मिल्ने डंगोल बताउँछन् ।