गैँडाकोट नगरपालिकामा अत्यावश्यक बाहेकका सेवा पूर्णरुपमा बन्द गरिने भएको छ । गैँडाकोटमा जेठ ३ गते राती १२ बजेदेखी १० गते राती १२ बजेसम्म एक हप्ता अत्यावश्यक बाहेकका सेवा बन्द गर्न लागिएको गैँडाकोट नगरपालिकाका नगर प्रमुख छत्रराज पौडेलले जानकारी दिनुभयो । जिल्लामा निषेधाज्ञा जारी रहेको अवस्थामा गैँडाकोटमा थप कडाई गर्न लागिएको हो । नगरपालिकामा औषधी उपचार गर्न र दुध तथा पानी खरिद बिक्रि गर्न बाहेक कोहीपनि घरबाहिर निस्कन र हिँडडुल गर्न प्रतिबन्ध लगाईएको छ । औषधी तथा दुध र पानी बिक्रि वितरण गर्ने पसलहरु बाहेक अन्य व्यापार व्यवसाय लगायत सम्पूर्ण क्रियाकलापहरु बन्द गर्ने जनाईएको छ । नगर स्तरिय विपद् व्यवस्थापन समितिको आईतबार बसेको बैठकले सो निर्णय गरेको हो । त्यस्तै गैँडाकोट नगरपालिका कार्यालय र वडा कार्यालयबाट प्रदान गरिने सेवाहरु मध्ये स्वास्थ्यसँग सम्बन्धित सेवा र फोहरमैला व्यवस्थापन गर्ने कार्य बाहेक अन्य सेवा बन्द गर्ने निर्णय गरिएको समितिका सदस्य ईश्वरीप्रसाद चापागाईले जानकारी दिनुभयो । नगरपालिका क्षेत्रभित्र सञ्चालित बैंक तथा सहकारी समेतका वित्तीय संस्था न्युनतम कर्मचारीको उपस्थितिमा हप्ताको दुई दिन सोमबार र विहिबार १० बजेदेखी १२ बजेसम्म २ घण्टा मात्र खुल्ला रहने गरि व्यवस्था मिलाउन भनिएको छ । एम्बुलेन्स, शववाहन, दुध र पानी ढुवानी गर्ने सवारी साधन, औषधी उपचारजन्य सामाग्री ढुवानीमा प्रयोग भएका सवारी साधन बाहेक अन्य कुनैपनि सवारी साधन चलाउन नपाईने उल्लेख गरिएको छ । त्यस्तै विवाह, व्रतबन्ध, पूजाआजा तथा अन्य चाडपर्व मनाउने जस्ता धार्मिक तथा सांस्कृतिक कार्यक्रममा समेत रोक लगाईएको छ । मृत्यु संस्कारमा १५ जना भन्दा वढि मलामी नजान र जानुपरेमा स्वास्थ्य सुरक्षा मापदण्डहरु अनिर्वाय गरिएको छ ।
