बैठकपछि पार्टीका प्रवक्ता विश्वप्रकाश शर्माका अनुसार बैठकले महामन्त्रीको तर्फबाट महामन्त्री पूर्णबहादुर खड्काले सांगठनिक प्रतिवेदन पेश गरेका थिए । उक्त प्रतिवेदनलाई बैठकले सर्वसम्मतिले पारित गरेको र पारित सांगठनिक प्रस्ताव केन्द्रिय महाधिवेशनको बन्दसत्रमा प्रस्तुत हुने प्रवक्ता शर्माले बताए  । 
त्यस्तै बैठकमा कोषाध्यक्षको तर्फबाट प्रस्तुत लेखासम्बन्धी प्रतिवेदन पेश भएको थियो । सो प्रतिवेदन पनि बैठकले सर्वसम्मतिले पारित गरेको प्रवक्ता शर्माले बताए । उनका अनुसार अहिले पार्टीसँग १० करोड रुपैयाँ भन्दा माथि मौज्दात रकम रहेको लेखासमितिको प्रतिवेदनमा उल्लेख छ । त्यस्तै बैठकले पार्टीका उपसभापति विमलेन्द्र निधी संयोजक रहेको पार्टीको नीति, अनुसन्धान तथा प्रशिक्षण प्रतिष्ठानले कार्यकालको बीचमा गरेका कार्यहरु सम्बन्धी प्रतिवेदन पेश गरेको र सो प्रतिवेदन पनि सर्वसम्मतरुपमा पारित गरेको छ ।

प्रवक्ता शर्माले केन्द्रिय कार्यसमितिबाट पारित सबै प्रतिवेदन पार्टीको १४ औँ महाधिवेशनको बन्दसत्रमा प्रस्तुत हुने बताए । त्यस्तै बैठकमा पेश भएको अनुमोदन सम्बन्धी प्रस्ताव पनि सर्वसम्मत पास भएको र बन्दसत्रमा जान मार्ग प्रशस्त भएको बताए ।

प्रवक्ता शर्माले बैठकमा पार्टीका नेताहरुले महाधिवेशनलाई अझै व्यवस्थित बनाउन र प्रभावकारी बनाउन गम्भीरताका साथ लाग्नुपर्ने धारणा राखेको थिए ।