ओलीको दावी : नेपाल श्रीलंका बन्दैछ, वृद्धभत्ता नदिए अनौठो नमान्नुहोला

२७ चैत, काठमाडौं । नेकपा एमालेका अध्यक्ष केपी शर्मा ओलीले देशको आर्थिक अवस्था बिग्रिएर श्रीलंकाको जस्तो बन्न लागेको दावी गरेका छन् । आइतबार एमालेनिकट शिक्षक संगठनको कार्यक्रम उद्घाटन गर्दैै उनले सरकारले तलव दिन नसक्ने अवस्था समेत आउन सक्ने जिकिर गरे ।

‘यो नेपालका लागि अनिष्टको समय हो,’ ओलीले भने, ‘एमालेका लागि होइन देशका लागि । अहिले देशको अर्थतन्त्र हेनुहोस् त श्रीलंका बन्दै छ नेपाल । केही समयपछि तनखा नपाए अनौठो नमान्नुहोला । तनखा दिन सक्ने अवस्था छैन । जेष्ठ नागरिकले भत्ता नपाए अनौंठो नमान्नुहोला । दिन सक्ने अवस्था छैन । योजनाहरु, आयोजनाहरु काटिदै छन् ।’