मल र वर्षाको अभावमा दाङमा धान रोपाइँ प्रभावित

१५ असार,  दाङ। आज असार १५ गते । अर्थात मानो रोपेर मुरी फलाउने दिन । दही चिउरा खाएर हर्ष उल्लासका साथ  आजको दिन सामूहिक रूपमा धान रोपाइ सुरु गरिन्छ ।

दाङमा भने यस वर्ष मनसुन ढिलो सक्रिय भएका कारण असार १५ गते हुँदा पनि अधिकांश ठाउँमा रोपाइँ सुरु भएको छैन । असारको मध्यसम्म १० प्रतिशत मात्रै रोपाइँ भएको कृषि ज्ञान केन्द्रका दाङले जनाएको छ ।

पोहोर समयमै मनसुन सक्रिय हुँदा रोपाइँ पनि छिटै सुरु भएको थियो । कृषि ज्ञान केन्द्रका अनुसार गत वर्ष असार १५ गतेसम्म जिल्लामा करिब ५० प्रतिशत बढी रोपाइँ भइसकेको थियो ।

दाङमा ३९ हजार ४ सय हेक्टर क्षेत्रफलमा धान खेती हुँदै आएको छ । असारको १५ गतेसम्म ३ हजार हेक्टरमा मात्रै रोपाइँ सकिएको कृषि अर्थ विज्ञ लामिछानेले बताए । उनका अनुसार दाङको देउखुरी क्षेत्र र बबई नदी किनार क्षेत्रमा बाहेक अधिकांश ठाउँमा रोपाइँ सुरु भएको छैन ।

दाङमा खेती हुने जमिन मध्ये ३० प्रतिशत क्षेत्रमा बाह्रै महिना प्रयाप्त सिंचाइ हुने कृषि ज्ञान केन्द्रले बताउँछ । बाँकी जमिनका भने आकाशे पानीकै भर पर्नुपर्ने अवस्था छ ।

मल नपाउँदा पनि समस्या

रोपाइँ ढिलो हुनुको अर्को कारण कृषकले समयमा मल नपाउनु पनि हो । कतिपय किसानले बिउ तयार भइसके पनि रासायनिक मल नहुँदा रोपाइँ सुरु गर्न सकेका छैनन् । ‘रोपाइँ गर्ने बेला भइसक्यो तर मल पाएको छैन’, घोराही उपमहानगर–१६ का किसान रामप्रसाद चौधरी भन्छन्, ‘मल बिना कसरी रोपाइँ सुरु गर्ने ?’

यो वर्ष युरिया मलको चरम अभाव छ । वर्षे धान र मकै खेतीको लागि भित्रिनुपर्ने युरिया मल भित्रिएको छैन । डीएपी र पोटास केही आए पनि त्यो किसानको लागि पर्याप्त छैन ।

जिल्लामा तत्काल १५ सय टन यूरिया र एक हजार टन डिएपी मल आवश्यक रहेको कृषि सामग्री कम्पनी लिमिटेड दाङका प्रमुख टिआर गौतमले जानकारी दिए । ‘मलको अभाव छ, आएको मल प्रयाप्त छैन’ उनले भने, ‘माथिल्लो तहबाट थप मल ल्याउन प्रयास भइरहेको छ । छिट्टै मल आइपुग्छ कि ?’