प्रधानमन्त्री नै एसपीपीमा सहभागी हुन चाहेको देखियो : डा. भीम रावल

काठमाडौं । नेकपा (एमाले)का नेता डा. भीम रावलले प्रधानमन्त्री शेरबहादुर देउवाले अमेरिकी स्टेट पार्टनरशीप पोग्राम (एसपीपी)मा सहभागी हुन चाहेको आरोप लगाउनुभएको छ ।

काठमाडौंमा भएको एक साक्षात्कार कार्यक्रममा डा. रावलले प्रधानमन्त्री देउवाले एसपीपी कार्यक्रम अगाडि बढाउन चाहेको भए पनि जनताको विरोधपछि पछि हटेको बताउनुभयो ।

अमेरिकालाई पत्र पठाइने भनेर मन्त्रिपरिषद्ले निर्णय गरेको भनिए पनि अहिलेसम्म पत्र नपठाउनुको कारणबारे प्रधानमन्त्री देउवाले जानकारी दिनुपर्ने माग गर्नुभयो ।

प्रधानमन्त्री देउवाले बाहिर–बाहिर एसपीपीमा सहभागी नहुने भने पनि भित्रभित्रै यसलाई लागू गराउन लागि परेको आफ्नो विश्वस्त स्रोतले बताएको उहाँको भनाइ छ ।

प्रधानमन्त्री देउवाको अमेरिकी भ्रमण तत्काल रोक्नुपर्ने भन्दै उहाँले निर्वाचनको संघारमा कुनै पनि देशका राष्ट्रप्रमुखले प्रभावशाली देशको भ्रमण गर्नुले आशंका उत्पन्न गराएको बताउनुभयो ।

संसदीय समितिमा जवाफ दिन आउनुपर्नेमा सरकारका मन्त्रीहरू नआएकोप्रति पनि उहाँले आपत्ति जनाउनुभयो । गठबन्धन सरकार र त्यसमा संलग्न राजनीतिक दलहरूले यसलाई अघि बढाउन खोजेको तथ्य आफूले फेला पारेको उहाँको भनाइ छ ।

‘जनताप्रति जवाफदेही बन्नुपर्दैन, नेपालको भौगोलिक अखण्डता र सार्वभौमसत्ताप्रति तपाईंहरू किन यति धेरै अपारदर्शी ?’ प्रधानमन्त्री देउवालाई प्रश्न राख्दै भीम रावलले भन्नुभयो, ‘अमेरिकालाई लेखेको पत्र तुरुन्त सार्वजनिक गरियोस् ।’

अहिले उठेका प्रश्नहरूको उत्तर नदिइ सरकार पछि हट्नुले पनि यसलाई पुष्टि गर्ने उहाँको भनाइ छ ।