जुम्लाबाट चुनाव लड्दै ज्ञानेन्द्र शाही

२३ साउन, काठमाडौं । राष्ट्रिय प्रजातन्त्र पार्टीका प्रवक्ता ज्ञानेन्द्र शाहीले प्रतिनिधि सभा निर्वाचनमा जुम्लाबाट चुनाव लड्ने भएका छन् ।

सोमबार काठमाडौंमा कार्यक्रम गरेर शाहीले जुम्लाबाट उम्मेदवारी दिने घोषणा गरेका हुन् ।

जुम्लामा पार्टीको उपस्थिति कमजोर रहेको स्वीकारेका राप्रपा प्रवक्ता शाहीले भने, ‘जिताउने हराउने जे भए पनि मेरै दाजुभाइहरुले गर्नेछन्, यसमा मेरो पश्चाताप रहने छैन भनेर मैले जुम्ला रोजेको हुँ ।’

प्रदेश र प्रतिनिधि सभाको चुनाव ४ मंसिरमा हुँदैछ । राप्रपा नेताहरुका अनुसार देशभरबाट उम्मेदवारहरुको नाम सिफारिस गर्न भनिएको छ । जसमा पार्टीको जुम्ला जिल्ला कार्यसमितिले पनि शाहीको मात्र नाम सिफारिस गरेको थियो ।