९ मंसिर, विराटनगर । नेपाली कांग्रेसका नेता डा. शेखर कोइरालाले दलका व्यक्तिप्रतिको वितृष्णा राष्ट्रिय स्वतन्त्र पार्टीमा पोखिएको बताएका छन् ।

निर्वाचित भएपछि विराटनगरमा सञ्चारकर्मीहरुसँगको कुराकानीमा उनले जनताले दलसँग भन्दा पनि दलका व्यक्तिप्रतिको वितृष्णा रास्वपालाई मत दिएर पोखेको बताए । अहिलेका दलले सुशासन दिन नसक्दा नयाँ दलले मत पाएको उनको भनाइ छ ।

‘परम्परागत राजनीतिक दलसँगको वितृष्णा भन्दा पनि व्यक्तिहरुसँगको वितृष्णा मैले देखिरहेको छु,’ उनले भने, ‘त्यो वितृष्णा पोखिएको हो, दलहरुप्रति वितृष्णा रह्यो भने दलीय सिस्टम नै रहँदैन ।’

अब बन्ने सरकारले सुशासन दिन नसक्ने हो भने यो वितृष्णा झन् बढ्ने भन्दै कोइरालाले सुशासनको मुद्दामा सबै दल मिलेर जानुपर्ने बताए । अब बन्ने सरकारले सुशासन कायम गर्न नसके आफूले संसदबाट प्रश्न उठाउने उनको भनाइ छ ।

उनले संसदीय दलको नेतामा दाबी गर्ने नगर्ने विषयमा अहिले नै निर्णयमा नपुगेको बताएका छन् । ‘नतिजा आइसकेको छैन, को को साथीले जित्नुभयो भन्ने सबै जानकारी छैन, समानुपातिकमा को हुने पनि थाहा छैन,’  उनले भने, ‘सल्लाह गरेर अघि बढ्छु ।’

मोरङ क्षेत्र नम्बर ६ बाट नेकपा एमालेका उम्मेदवार लालबाबु पण्डितलाई पराजित गर्दै कोइराला प्रतिनिधिसभा सदस्यमा निर्वाचित भएका हुन् ।