प्रहरीले चोरीको मोटरसाइकलसहित चोरीमा संलग्न भएको आरोपमा एक गिरोहलाई पक्राउ गरेको छ । भरतपुर महानगरपालिका वडा नम्बर १९ स्थित प्रेमसिंह तामाङको घरको बरन्डामा पार्किङ गरी राखेको अवस्थामा हराएको ना ४३ प १९३३ नम्बरको मोटरसाईकल खोजी गर्ने क्रममा गिरोह समातिएको हो । मोटरसाइकल गत चैत २० गतेदेखि हराएको थियो । हराएको खबर पाएपछि जिल्ला प्रहरी कार्यालयबाट खटिएको सादा पोशाकको प्रहरी अधिकृत सहितको टोली र प्रहरी बिट कृष्णपुरबाट खटिएको टोलीले अनुसन्धान तथा खोजतलास गर्दै जाँदा वैशाख २८ गते चोरी गर्नेमध्ये एकजना पक्राउ परेका थिए । पक्राउ परेका भरतपुर-१९ शारदानर बस्ने वर्ष २०का आकाश तामाङलाई नियन्त्रणमा लिई सोधपुछ गर्ने क्रममा अरू दुई जना पनि पक्राउ परेका छन् । पूर्वि नवलपरासी, गैंडाकोट नगरपालिका वडा नम्बर-७ गैह्री स्थायी घर भई भरतपुर महानगरपालिका-५ गुम्वाटोलमा डेरागरी बस्ने वर्ष २८ का दुर्गा पौडेलको घरकोठामा लुकाई राखेको ना ४३ प १९३३ को मोटरसाईकल वैशाख २९ गते बरामद गरी सोधपुछ गर्दा उक्त घटनामा संलग्न थप गैंडाकोट- ९ थुम्सी बस्ने वर्ष २०का सन्दिप आलेलाई वैशाख ३० गते नियन्त्रणमा लिई थप अनुसन्धान भईरहेको चितवन प्रहरीले जानकारी दिएको छ ।
