नेपाल प्रहरीमा बढुवा सकसः एसएसपीको पद खाली राखेर फेरि डीआईजीको दरबन्दी थप्ने तयारी

पूर्वएसएसपी यादवराज खनालको मुद्दामा सर्वोच्च अदालतले तीन महिनाभित्र एसएसपीमा बढुवा गरिसक्नुपर्ने आदेश गरेका थियो । तर, अहिलेसम्म प्रहरी प्रधान कार्यालय र गृह मन्त्रालयले सो आदेशको अवज्ञा गरिरहेका छन् ।

२०७६ चैत मा मन्त्रिपरिषदले प्रशासनतर्फका डीआईजीको संख्या घटाएर १४ मा राख्ने निर्णय गरेको थियो । तर, ०७७ मंसिरमा फेरि पाँचजना डीआईजी र एक जना अतिरिक्त महानिरीक्षक (एआईजी) थप्ने निर्णय गरिएको थियो । करिब १० महिनाको अवधिमा अहिले फेरि डीआईजी थप्ने तयारी थालिएको हो ।

नेपाल प्रहरीमा हाल प्रशासनतर्फ १४ र प्राविधिक ८ गरी २२ जना डीआईजी छन् । उनीहरुमध्ये अवकाशमा जान लागेका प्रहरी बरिष्ठ उपरीक्षक (एसएसपी) हरिराज वाग्ले, पूजा सिंह, नरबहादुर खत्री, सुशील यादव, मोहन आचार्य र नलप्रसाद उपाध्यायलाई डीआईजी बनाउने गरी पद  सिर्जना गर्न लागिएको स्रोतले बतायो । 

सरकारको तयारीअनुसार डीआईजीको दरबन्दी थप भएमा एसएसपीबाट अवकाश पाउन लागेका अधिकृतहरूले बढुवा हुने अवसर पाउनेछन् ।

यसैबीच, गृहमन्त्रालयका पूर्वसचिव चण्डीप्रसाद श्रेष्ठ राज्यको आवश्यकता र आर्थिक भार हेरेर मात्रै माथिल्लो दर्जा थप्ने निर्णय गर्नुपर्ने बताउँछन् । ‘करिब डेढ वर्षको अवधिमा दुईपटक डीआईजीको पद थप्नुपर्ने अवस्था कसरी आयो ?’ श्रेष्ठले भने, ‘आफ्ना मान्छेलाई ल्याउन मात्र चाजोपाँजो मिलाइन्छ, यसरी कसैलाई टिप्नका लागी पद थप्ने कुरा तर्कसंगत भएन ।’