कावासोती । नवलपुरमा आगामी शनिबार देखि जलपंछीको गणना सुरू हुँदैछ । ताल, तलैया, नदी र सिमसार क्षेत्रमा पाइने जलपन्छीहरूको संख्या, प्रजाति र वासस्थानको अवस्थाबारे जानकारी लिन हरेक वर्ष जनवरी महिनाको पहिलो शनिवारबाट जलपन्छी गणना सुरू हुन्छ ।
यस वर्षको गणना जनवरी ४ देखि सुरू भएको हो । नवलपुरमा भने आगामी शनिबार गणना गर्न लागिएको हो । यस अवधिमा पानीमा आश्रित तथा पानी वरिपरि बस्ने आवासीय र बसाइसराई गर्ने चराहरूको तथ्याङ्क संकलन गरिने जलपंछी गणनाका नवलपुरका संयोजक डिबी चौधरीले जानकारी दिए । उनका अनुसार गणनामा पंछी बिद, नेचर गाईड, पत्रकार तथा अन्य सरोकारवाला सहित ४० जनाको सहभागिता रहनेछ ।
संयोजक चौधरीका अनुसार नवलपुरको शिख्रौली देखि सम्म ४ वटा समुह बनाएर गणना गरिने छ । शिख्रौली देखि पिठौली सम्म नारायाणीको उत्तरी भंगालोमा पानीको कम भएकाले हिडेर गणना गरिने उनले बताए । नारायणीको दक्षिणी भंगालोको शिख्रौली देखि अमलटारी सम्म र अमलटारी देखि त्रिवेणी सम्म डुङ्गाको प्रयोग गरिने छ ।
गतवर्ष देशभरका १८ प्रमुख सिमसारक्षेत्रहरू अन्तर्गत ८४ वटा साना क्षेत्रहरूमा गरिएको जलपन्छी गणनामा ७९ प्रजातिका ६३,९०० जलपक्षीहरू रेकर्ड भएका थिए। गणना गरिएका क्षेत्रमध्ये ६ वटा रामसारमा सूचीकृत सिमसारक्षेत्रहरू पनि थिए। गणनामा ४०२ स्वयंसेवकहरू सहभागी थिए ।
