काठमाडौं । जलवायु विज्ञहरुले विपद्जन्य हानी तथा नोक्सानीका कारण नेपालले विगत ८ वर्षमा करिव साढे १८ करोड अमेरिकी डलर बराबरको नोक्सानी भोगेको बताएका छन् ।
मंगलवार काठमाडौंमा आयोजित एक कार्यक्रममा विज्ञहरुले आउने दिनमा जलवायुजन्य विपद्का घटनाहरुमा उल्लेख्य वृद्धि हुने बताए । बाढी, पहिरो, समुन्द्री आँधी लगायतका घटनाहरु बढी भन्दा बढी वृद्धि हुने उनीहरुले बताएका हुन् ।
निर्देशक सिंहले भन्नुभयो, ‘अब आउँदा दिनहरुमा एक्स्ट्रिम क्लाइमेट इभेण्टका घटनाहरु बढ्दै जानेछन् भन्ने खालको एउटा निस्कर्ष निकालिएको छ । बाढी, पहिरो, समुन्द्री आँधी वा त्यस्ता घटनाहरु बढ्दै जाने र त्यस घटनाहरुले प्राकृतिक मानवीय प्रणालीमा असर पर्दछ । भन्नेखालको कुरा आइपीसिसीले निकालेको निस्कर्ष हो । यसको ज्वलन्त उदाहरण मेलम्चीको बाढीलाई हेर्नसक्छौँ । लस एण्ड ड्यामेजको कुरा गर्दा जलवायु परिवर्तनसँग सम्बन्धित युएनएफसिसिसीले कस्ता खालका लस एण्ड ड्यामेज हनसक्छन् भन्दा दुई वटा क्याटागोरीमा लस एण्ड ड्यामेजलाई छुट्याएको छ । एउटा आर्थिक हानी तथा नोक्शानी छ । अर्को गैरआर्थिक हानी तथा नोक्शानी छ ।’
निर्देशक सिंहले मेलम्चीको बाढीका कारण प्राकृतिक श्रोत, इकोसिस्टम, आर्थिक, सामाजिक, सांस्कृतिक असरहरु बढी भएको बताउनुभयो । उहाँले बाढीका कारण प्राकृतिक सौन्दर्यमा पनि असर परेको बताउनुभयो । उहाँले बाढीका कारण बसाइँसराइको समस्यासमेत बढेको बताउनुभयो । बाढीले घरायसी काममा महिलाहरुको बोझ झनै थपिएको बताउनुभयो ।
