घाम, पानी, दिनरात र बिदा नभनि यतिबेला देवचुलीका स्वास्थ्यकर्मीहरु कोरोना संक्रमितको स्वास्थ्य अवस्था बुझ्न घरदैलोमा व्यस्त रहेका छन् । महामारीका रुपमा फैलिएको दोस्रो भेरियन्ट सहितको नयाँ कोरोना भाईरस संक्रमणले देवचुली नगरपालिकालाई पनि अछुतो राख्न सकेन । कोरोना संक्रमण भएर होम आइसोलेसनमा बसिरहेका व्यक्तिहरुको मनोबल बढाउन र उनीहरुको स्वास्थ्य अवस्था बुझ्न देवचुली नगरपालिकाका स्वास्थ्यकमीहरु घरमै पुगिरहेका छन् । यो विषम परिस्थिीतमा कोरोना संक्रमित भई होम आइसोलेसनमा रहेका व्यक्तिहरुलाई स्वास्थ्यकर्मीहरु घरमा नै पुगि स्वास्थ्य अवस्थाको बारेमा बुझदा संक्रमितहरु पनि खुशी भएका छन् । यो समयमा सबैभन्दा ठुलो औषधि नै हौसला रहेको संक्रमितको भनाईछ । यसरी होम आइसोलेनमा बस्दा दिक्क लाग्ने र मनमा धेरै कुराहरु खेल्ने गरेको तर स्वास्थ्यकर्मीहरु घरमा आई हौसला साथ र सहयोग दिँदा आँफूलाई निको महशुस भएको संकमण भएर बसिरहनुभएकी देवचुलीकी एक महिलाले बताउनुभयो । यस्तै अर्का एकजना संक्रमितले आफ्नो ज्यानको बाजी राखेर संक्रमितको स्वास्थ्य अवस्था बुझ्न घरमा पुग्नु नै महान कार्य रहेकाले स्वास्थ्यकर्मीहरुलाई धन्यवाद समेत व्यक्त गर्नुभयो । यसरी घरमै गई परामर्श गर्दा संक्रमितको मनोबल उच्च हुने र छिट्टै नै कोभिडलाई पराजित गर्न सक्ने देवचुली नगरपालिका स्वास्थ्य शाखा प्रमुख राम कुमार श्रेष्ठले बताउनुभएको छ । अहिले सम्म देवचुली नगरपालिकामा संक्रमित भएका ३ सय २४ जना मध्य ३ सय ७ जना कोरोना संक्रमितको घरमा पुगि आवश्यक औषधि तथा स्वास्थ्य सामाग्रीहरु वितरण गरिएको देवचुली नगरपालिका स्वास्थ्य शाखा सि.अ.हे.व अधिकृत शिव पराजुलीले बताउनुभयो ।
