कावासोती । चितवनमा एउटा पोथी गैंडा मृत फेला परेको छ ।
भरतपुर महानगरपालिका वडा नम्बर २६ भगेडी भन्ने स्थानमा एक व्यक्तिको मकै बारीमा २० वर्षको पोथी गैंडा मृत फेला परेको हो ।
कालाबञ्जर मध्यवर्ती उपभोक्ता सामुदायिक वन क्षेत्र नजिकैको मकै बारीमा एउटा बुढो पोथी गैंडा मृत फेला परेको चितवन राष्ट्रिय निकुञ्जका सूचना अधिकारी गणेशप्रसाद तिवारीले जानकारी दिए ।
उनका अनुसार गैंडाको खाग र खुर सुरक्षित छ भने शरिरमा कुनै चोटपटक देखिएको छैन । उक्त गैंडा बुढो भएर मरेको हुन सक्ने अनुमान गरिएको तिवारीले बताए । गैंडा मृत फेला परेको विषयमा थप अनुसन्धान भइरहेको छ । मृत गैंडाको वरपर पनि कुनै शंकास्पद वस्तु भेटिएको छैन ।
चालु आर्थिक वर्षमा गैंडाको यो पहिलो मृत्यु हो । गत आर्थिक वर्षमा चितवनमा २१ वटा गैंडाको मृत्यु भएको थियो । १८ वटा कालगतीले र दुई वटा चोरी शिकारीले मृत्यु भएको थियो । एउटा गैंडाको मृत्युको कारण भने खुलेको छैन ।
तस्बिर : निकुञ्ज प्रशासन
